Bəzi hallarda insanlar valideynləri (və ya onlara bərabər tutulan şəxslər) tərəfindən onlara verilən ad və ya soyadın dəyişdirilməsini istəyirlər. Bu, uşağa verilən adın mental dəyərlərə və yaxud Azərbaycan dilinin leksikasına uyğun olmaması, həmin adın cəmiyyətdə birmənalı qarşılanmayacaq dərəcədə qəribə səslənməsi və digər amillərlə bağlıdır.

Azərbaycan Respublikası vətəndaşlarının öz adını, ata adını və soyadını dəyişdirməsinə 18 yaşına çatdıqdan sonra yol verilir. Uşaq 18 yaşına çatana qədər onun adının dəyişdirilməsi, eləcə də soyadının digər valideynin soyadına dəyişdirilməsi valideynlərin birgə xahişi ilə yerli icra hakimiyyətlərinin qəyyumluq və himayə orqanlarının icazəsi əsasında həyata keçirilir.

Şəxs öz ad (və yaxud soyadını) dəyişdirmək üçün hara müraciət etməlidir?

Bunun üçün şəxs müvafiq sənədlərlə birlikdə qeydiyyat şöbəsinə (ZAQS idarəsinə) və yaxud konsulluq idarəsinə (əgər Azərbaycan Respublikasının vətəndaşı xarici ölkədə daimi və ya il ərzində 182 gündən artıq müvəqqəti yaşayırsa) müraciət etməlidir.

Ad və soyadın dəyişdirilməsi üçün hansı sənədlər tələb olunur?

Ad və soyadı dəyişdirmək üçün ərizəyə əlavə edilən zəruri sənədlər aşağıdakılardır:

• Adın, ata adının və soyadın dəyişdirilməsi haqqında ərizə;
• Ərizə verən şəxsin doğumu haqqında şəhadətnamə;
• Ərizə verən şəxs nikahdadırsa, nikah haqqında şəhadətnamə;
• Ərizə verən şəxsin nikahı pozulmuşdursa, nikahın pozulması haqqında şəhadətnamə;
• Ərizə verən şəxsin yetkinlik yaşına çatmayan uşaqları vardırsa, onların doğumu haqqında şəhadətnamələr;
• Şəxsiyyəti təsdiq edən sənədin notariat qaydasında təsdiq olunmuş surəti;
• İlkin hərbi qeydiyyata alınma haqqında vəsiqənin və ya hərbi biletin notariat qaydasında təsdiq edilmiş surəti;
• Ərizə verən şəxsin 3x4sm ölçüdə 2 ədəd fotoşəkili;
• Dövlət rüsumunun ödənilməsi barədə sənəd

Adın və soyadın dəyişdirilməsinin qeydə alınması üçün dövlət rüsumu 15 manat təşkil edir.

Hansı hallarda şəxsin ad və soyadının dəyişdirilməsinə yol verilmir?

1) ərizə verən şəxs cinayət mühakimə icraatına şübhəli və ya təqsirləndirilən şəxs qismində cəlb edildiyi dövrdə;

2) ərizə vermiş şəxsin götürülməmiş və ya ödənilməmiş məhkumluğu olduqda;

3) müraciət etmiş şəxs barəsində tibbi xarakterli məcburi tədbirlər tətbiq edildikdə.

Bu və digər əsaslarla ad və soyadının dəyişdirilməsi ilə bağlı müraciətinə imtina cavabı almış şəxs inzibati məhkəmə icraatı qaydasında məhkəməyə müraciət edə bilər.